[prenta uppsett í dálka] 66. fundur
Hjálmar Jónsson (andsvar):
Herra forseti. Ég þakka svörin. Við tölum nokkurn veginn sama tungumálið. Hins vegar gætir misskilnings milli okkar. Ég sagði að þessi nefndarskipan og þessi fræga nefnd, karlanefnd, endurspeglaði það í þjóðfélaginu að þeir voru skipaðir, þeir settu sig ekki sjálfir í nefndina. Þeir eru settir í nefndina og ekki af fámennum hópi heldur eru þeir sumir hverjir kosnir og konur voru í meiri hluta þegar nefndin var skipuð upphaflega. Síðan hefur það gerst sem endurspeglar þjóðfélagið að karlar eru komnir í staðinn.
En hvað varðar það sem hv. þm. nefndi um lög um sóknarnefndir, héraðsfundi og fleira frá 1985, þá eru býsna ítarleg lög í gildi núna sem verða felld brott og kirkjan fær sjálf og kirkjuþing, og þá leikmenn í meiri hluta að ákveða hvernig þeim málum verður háttað. Því sagði ég í ræðu minni að kirkjunnar bíði núna mikið starf í því að móta sínar stjórnunaraðferðir.
