Félagsmálaráðherra (Páll Pétursson):
Herra forseti. Ég tel að samflot séu að mörgu leyti heppilegri og líklegri til árangurs fyrir verkalýðshreyfinguna en kjarasamningar í svo mörgum pörtum sem þeir eru nú. Hitt er svo aftur eðlilegt að þegar um samflot hefur verið að ræða í nokkurn tíma, þá vilji einstakir hópar þrýsta á um sérkjaraviðræður og það er akkúrat það sem er að gerast núna.
Ég er, herra forseti, nokkuð bjartsýnn á að innan fárra vikna fari að sjá allverulegan árangur í kjarasamningunum. Eftir því sem ég hef heyrt frá aðilum vinnumarkaðarins, þ.e. frá sáttasemjara, atvinnurekendum og síðast en ekki síst frá launamönnum, þá er ekki áberandi óánægja með viðræðuáætlanirnar heldur þvert á móti.