Svavar Gestsson:
Herra forseti. Á þskj. 599 flyt ég brtt. sem er þriðja tilraun til að lögfesta það að verðlækkanir skuli einnig teknar með í lögunum en ekki bara útgreiðsla arðs. Það er búið að fella svipaðar tillögur tvisvar. Það var gert við 2. umr. Nú er gerð þriðja og líklega síðasta tilraun í þá veru. Hér er tekið upp orðalag hinnar umdeildu bókunar borgarstjóra, iðnrh. og bæjarstjórans á Akureyri. Það er á þessa leið: ,,Það er forgangsverkefni að raunverð á raforku lækki samkvæmt samningnum frá 28. október 1996, áður en arður verður greiddur út samkvæmt sama samkomulagi.``
Þetta er nákvæmlega það sem allir stuðningsmenn málsins í gær héldu fram að væri í málinu. Ég er hér með tillögu, herra forseti, um að orð þeirra verði gerð að lögum og ég vona að þeir styðji það sjálfir.