Samgönguráðherra (Halldór Blöndal) (andsvar):
Herra forseti. Samkvæmt flugmálaáætlun eins og hún var samþykkt á sl. vori er gert ráð fyrir 117 millj. kr. til Reykjavíkurflugvallar (Gripið fram í: 127.) 117 til endurnýjunar slitlags, svo rétt sé með farið. Það gefur auðvitað auga leið að þetta hrekkur skammt í 1,3 milljarða, eins og flugráð talar um að þurfi til að vinna verkið, en nauðsynlegt er að það verði unnið á tveimur til þremur árum. Eins og ég sagði áðan líka, þá var ákvörðun um frestun á framkvæmdum við Reykjavíkurflugvöll tekin fyrir átta árum, á árunum 1988--1989, og ef flugráð væri sjálfu sér samkvæmt hefði það að sjálfsögðu mótmælt því að ráðist yrði í Egilsstaðaflugvöll á sínum tíma og óskað eftir því að Reykjavíkurflugvöllur yrði látinn sitja fyrir ef flugráð hefði séð fram á að flugvöllurinn yrði hættulegur á því herrans ári 1996 eða 1997, sem ég hygg að flugráð hafi alls ekki séð fyrir.