Samgönguráðherra (Halldór Blöndal):
Herra forseti. Það er mikill misskilningur hjá hv. þingmanni Þjóðvaka sem hér talaði áðan að ástandið væri verra hér á landi í þessum efnum en í öðrum löndum. Samt sagði hv. þm. að ef skýrsla af þessu tagi hefði birst í útlöndum hefði ráðherra sennilega orðið að segja af sér.
Ástandið hér á landi er betra en í öðrum löndum og við höfum gengið lengra í öryggiskröfum fyrir sjómenn en aðrar þjóðir. Og út af því sem hv. þm. Guðmundur Hallvarðsson spurði um áðan, þá vil ég að það komi fram að það er einmitt í tillögum Siglingastofnunar að settar verði reglur um lágmarksfríborð fiskiskipa og það mál verður rætt í siglingaráði þar sem hv. þm. á sæti fyrir samgrn. Ég vil taka undir það með hv. þm. Stefáni Guðmundssyni að það er rétt að samgn. ræði öryggismál sjómanna, þennan þátt sem aðra. Það hafa komið mál til samgn. sem varða öryggismál sjómanna og ég mun beita mér fyrir því að Siglingastofnun bjóði samgn. til sín og kynni fyrir henni þau störf sem þar er verið að vinna og varða sjómenn eins og aðra.
Til að ekki vakni misskilningur af því að ég nefndi eitt fiskiskip áðan, Níels Jónsson, að því gefna tilefni, sem ég var að segja að væri einungis af því að þegar hann var smíðaður voru ekki uppi kröfur um stöðugleika, en þau skip standast auðvitað öll kröfur um stöðugleika og hafa slík vottorð sem smíðuð voru svo seint. Þetta vildi ég taka fram þannig að það sé enginn vafi um það, enda er það svo, og kemur fram í skýrslunni, að 80% þilfarsfiskiskipa sem skoðuð voru hafa fullkominn stöðugleikagögn. Mörg önnur eru mjög nálægt því. Um önnur liggja ekki fyrir upplýsingar enn, en það er verið að vinna að þessum málum og eins og ég sagði erum við á undan öðrum þjóðum í því.
Um sleppibúnaðinn er það að segja að hinn 20. febr. sl. samþykkti siglingaráð á fundi sínum reglugerð um sleppibúnaðinn og er búist við því að þær reglur gangi í gildi 1. apríl. (Forseti hringir.)
Aðeins eitt atriði enn, og ég biðst afsökunar á því af því að málið er þannig vaxið, þá hefur ekki verið vikið frá öryggiskröfum um fiskiskip og þess ekki getið í haffærisskírteini en á hinn bóginn eru nokkur skip þannig, t.d. allar norsku ferjurnar, að þær hafa einungis takmarkað farsvið og er þess þá getið í haffærisskírteini. Hið sama á við um Íslending, knörrinn sem er mikið stolt okkar Íslendinga, fallegt skip og vel smíðað, en engin von er til þess að það standist fyllstu kröfur um útbúnað nýtískulegra skipa.