[prenta uppsett í dálka] 87. fundur
Viðskiptaráðherra (Finnur Ingólfsson) (andsvar):
Herra forseti. Það sem fram kom í Morgunblaðinu og var vitnað í er allt saman hárrétt. Því með þeirri breytingu að opna hlutafélögin, sem verða til að byrja með í eigu ríkisins, þannig að einstaklingar og einkaaðilar geti eignast samanlagt allt að 35% af hlutafé í viðkomandi stofnun er verið að opna fyrir nýja aðila, einkaaðila, til að koma inn í bankakerfið.
Að því er hv. þm. vitnaði í skýrslu frá fyrrv. hæstv. viðskrh. um eignatengslin þá er það rétt. Sú skýrsla var unnin á vegum Samkeppnisstofnunar. Með hana hefur ekki neitt verið gert hvorki í tíð núv. viðskrh. né tíð fyrrv. viðskrh. Hún hefur legið sem merkilegt plagg, engu að síður, í viðskrn. En það er stefnuyfirlýsingin sem skiptir höfuðmáli sem fram kemur í því frv. sem hér er búið að mæla fyrir, að það er stefnt að dreifðri eignaraðild og hlutafjáraukningin verður í höndum ríkisstjórnarinnar. Þar verður farið eftir þeirri stefnuyfirlýsingu sem gefin er í viðkomandi lagafrv.
