Margrét Frímannsdóttir:
Virðulegur forseti. Hluti þeirra breytinga sem kynntar hafa verið um skattalækkanir sem ríkisstjórnin hefur boðað er af hinu góða. Óþolandi háir jaðarskattar hafa bitnað af fullkominni hörku á ungu fjölskyldufólki sem er t.d. að eignast húsnæði og þar sem tekið er á þeirra málum og boðaðar lækkanir hversu litlar sem þær eru, þá er það auðvitað af hinu góða. Það sem veldur vonbrigðum er að þessar breytingar eru ekki notaðar til að jafna lífskjörin. Þvert á móti virðist ágóði þeirra sem mestar hafa tekjurnar mun meiri en þeirra sem vart hafa til framfærslu.
Það hafa verið nefndar ýmsar tölur en við skulum taka dæmi af því hvernig þessir hlutir líta út í dag og síðan að tveimur árum liðnum. Ef við tökum dæmi um einstakling sem er með 100 þús. kr. tekjur í dag þá hefur hann í tekjur eftir skatta 84.243 kr. Eftir tvö ár og allar þessar breytingar sem boðaðar eru hefur þessi sami einstaklingur um 112.161 kr. í tekjur og tekjur eftir skatta eru 94.596 kr. Ágóðinn, það sem hann hefur áunnið sér á þessum tveimur árum er 10.353 kr. Það er nú allur ábatinn af þessum skattalækkunum. Ef við tökum hjón með tvö börn sem eru með 180 þús. kr. mánaðartekjur í dag þá eru tekjur þeirra eftir skatta 169.212 kr., verða eftir tvö ár 201.890 kr., tekjur eftir skatta 188.773 kr. Ágóðinn er 19.562 kr. í raun --- og þarna inn í er búið að taka ekki bara skattkerfisbreytingarnar heldur allar boðaðar launahækkanir. Það þarf sem sagt tvö ár til að ná þessum tæpum 20 þús. kr. í launahækkun.