Geir H. Haarde (andsvar):
Herra forseti. Ríkið yrði að sjálfsögðu laust undan ábyrgð eigenda sem slíkra en vissulega hefur ríkið almennum skyldum að gegna í þjóðfélaginu, m.a. þeim að setja löggjöf, rammalöggjöf um bankastarfsemi eins og gert hefur verið. Við höfum gjörbreytt hér á undanförnum árum löggjöfinni um viðskiptabanka og mjög margt annað og með dyggilegri aðstoð Alþfl. á undanförnum árum hefur það verið gert. Vissulega mun ríkið áfram hafa skyldum að gegna í peningamálum og í fjármálaheiminum á Íslandi þó að það muni ekki eiga viðskiptabankana. En þær skyldur eru allt annars eðlis og algjörlega óháðar því hvort íslenskir skattgreiðendur binda milljarða kr. í hlutum í þessum stofnunum eins og nú er gert. Þessa peninga væri hægt að nota með mjög eftirsóknarverðum hætti í margt annað heldur en nú er gert.