Árni M. Mathiesen:
Herra forseti. Hv. þm. Össur Skarphéðinsson sýnir hæstv. heilbrrh. mikla ósanngirni í þessu máli því verið er að beita nýjum vinnubrögðum í heilbrrn., faglegum vinnubrögðum, þar sem tekið er tillit til íbúafjölda, þjónustustigs og síðan annarra breytilegra þátta á svæði sjúkrahúsanna. Slík vinnubrögð voru ekki viðhöfð í heilbrrn. á síðasta kjörtímabili. Þá lögðu ráðherrar Alþfl. til allt að 50% niðurskurð á sjúkrahúsum hér á höfuðborgarsvæðinu, t.d. á St. Jósefsspítalanum. Þar var niðurskurðurinn 26% á einu ári. Það er hvergi í þessum tillögum verið að leggja til slíkan niðurskurð í þessum sjúkrahúsum. Ég endurtek að þetta er ósanngirni í garð hæstv. ráðherra. Það er verið að viðhafa hér fagleg vinnubrögð sem eru til mikilla bóta frá því sem var á síðasta kjörtímabili.