Viðskiptaráðherra (Finnur Ingólfsson) (andsvar):
Herra forseti. Hv. þm. spurði við umræðuna hvort eitthvað af þessum rannsóknum hefðu farið fram og könnunum við undirbúning málsins sem komu fram á fyrirspurn á þskj. 730 sem lögð var fram af hv. þm. Jóhönnu Sigurðardóttur og Guðmundi Árna Stefánssyni. Það er rétt að mikið af þessu hefur verið kannað. Hér í andsvari treysti ég mér ekki til þess að svara því efnislega en mun síðar við umræðuna leitast eftir að svara þeim spurningum öllum sem fram koma á meðfylgjandi þingskjali. Sé eitthvað sem ekki næst að svara við þessa umræðu þá er ráðuneytið og ég tilbúinn til að láta þingnefndinni í té öll þau gögn sem þar er óskað eftir og vinna að málinu í samvinnu við nefndina á grundvelli þeirra gagna sem óskað er í þessari fyrirspurn.