[prenta uppsett í dálka] 120. fundur
Hjálmar Jónsson (andsvar):
Herra forseti. Við Háskóla Íslands er stundað akademískt nám í öllum greinum, einnig í guðfræði. Menn hafa ekki viljað blanda því sérstaklega saman að verið sé að mennta embættismannastétt sérstaklega, það er verið að mennta til kandídatsprófs en ekki embættismenn. Þess vegna hefur vantað upp á þjálfunina. Hún hefur verið samhliða. Síðan var farið í að bæta við fjórum mánuðum fyrst í starfsþjálfun eftir kandídatspróf. Nú er einfaldlega svo að menn telja nægjanlegt að hafa það tvo mánuði og menn séu þá tilbúnir að fara út á akurinn til starfs eftir þessa tveggja mánaða starfsþjálfun.
