Kristín Halldórsdóttir:
Herra forseti. Frv. fjallar ekki um starfsemi járnblendiverksmiðjunnar í Hvalfirði né starfsskilyrði heldur aðeins um eignaraðild. Fyrir mér er ekkert höfuðatriði hvernig eignaraðild er háttað heldur hitt hvaða reglur gilda um starfsemina, að þær tryggi góð vinnuskilyrði, að skaðsemi á umhverfi og náttúru verði sem allra minnst og að eðlilegur fjárhagslegur hagnaður verði af starfseminni. Þær breytingar á eignaraðild sem eru lagðar til eru hins vegar forsenda fyrir stækkun verksmiðjunnar sem þýðir auknar virkjanir og umhverfisspjöll á hálendinu. Sú aukna framleiðslugeta sem stefnt er að mun m.a. hafa í för með sér losun koltvíoxíðs sem nemur nær 170 þúsund tonnum á ári.
Ég er í grundvallaratriðum andvíg aukinni stóriðju á Íslandi og greiði því atkvæði gegn frv.