[prenta uppsett í dálka] 3. fundur
Steingrímur J. Sigfússon:
Herra forseti. Ég þakka hæstv. utanrrh. fyrir þessi svör og ágæt orð og fagna því að hann er Bandaríkjamönnum ekki jafnfylgispakur í þessu máli og í sumum öðrum tilvikum. Ég held að ástæða sé til að undirstrika það að hér er grundvallarmál á ferð og það skiptir í sjálfu sér ekki máli hvort að einstök íslensk fyrirtæki hafa beinlínis orðið fyrir barðinu á þessari stefnu bandarískra stjórnvalda eða ekki. Málið snýr líka að Íslandi sem sjálfstæðu ríki því að í nefndum lögum eru m.a. ákvæði sem heimila refsiaðgerðir gegn ríkjum, ekki aðeins fyrirtækjum eða einstaklingum, heldur einnig gegn ríkjum sem til að mynda aðstoða Kúbumenn á viðskiptasviðinu o.s.frv. Þessi lagasetning sem og stefna bandarískra stjórnvalda er hvernig sem á það er litið dæmalaus og í raun og veru fáheyrð í samskiptum ríkja, slíkur hroki og yfirgangur kemur fram í þessu tilviki. Ég hvet því hæstv. utanrrh. til þess að vera ákveðið í hópi þeirra manna sem mótmæla lagasetningunni kröftuglega og vinna að því að hún verði felld úr gildi.
