Svavar Gestsson:
Virðulegi forseti. Ég þakka hæstv. forsrh. fyrir þá mikilvægu yfirlýsingu sem hann gaf hér. Hún er mikilvæg vegna þess að í stjórnarsáttmálanum er gert ráð fyrir því að stjórnarflokkarnir fjalli einir um þetta mál. Það er bersýnilegt að forsrh. er þeirrar skoðunar að skynsamlegra sé að byrja á því að kalla til fulltrúa allra þeirra flokka sem eiga menn í þessari virðulegu stofnun, a.m.k. til að byrja með, og vonandi verður ekki þörf á því að hafa það öðruvísi eins og hæstv. ráðherra orðaði það hér áðan. Það er úrslitaatriði að unnið verði að því að reyna að ná samkomulagi um þetta mál í heild, aukið jafnvægi bæði í þessum málum og öðrum í landi okkar. Það er meginmálið og lykillinn að lausn málsins sem hér er spurt um.