Viðskiptaráðherra (Finnur Ingólfsson):
Herra forseti. Hv. þm. beindi til mín tveimur spurningum. Sú fyrri snýr að því að hækkanir á grænmeti og kartöflum hafi leitt til þess að skuldir heimilanna hafa aukist. Það kemur fram hjá hv. þm. að hækkanir á grænmeti stafi fyrst og fremst af slæmri útfærslu GATT-samningsins. Það er ekki rétt og ég veit að hv. þm., sem hagfræðingur, veit auðvitað miklu betur. Það eru lítil rök eða vísbendingar um að þessar verðhækkanir sem orðið hafa á grænmeti og kartöflum að undanförnu, tengist GATT-samningnum. Verðsveiflur á þessum vörutegundum eru ekki bara bundnar við innlenda framleiðslu, þær eru líka bundnar við innflutninginn. Dæmi um þetta má nefna af því að hv. þm. telur að um sé að ræða 1.300 millj. kr. hækkun. Í sumar sem leið hækkuðu kartöflur um 52% í júlí. Þessu var slegið upp í fjölmiðlum. Það var talið að þessi hækkun ylli 0,18% hækkun á vísitölu neysluvöruverðs. Þetta leiddi til hækkunar á skuldum heimilanna um 540 millj. kr. Þegar kartöflurnar lækkuðu aftur í ágúst um 0,10% þá leiddi það til lækkunar á skuldum heimilanna um 300 millj. kr. Síðan í október lækkuðu þær aftur um 0,08%. Það leiddi til 240 millj. kr. lækkunar á skuldum heimilanna. Þannig að þegar menn horfa á alla þessa mynd, verða menn að halda öllu til haga í þessum efnum en ekki slá bara upp einhliða tölum um það hve skuldir heimilanna hafa hækkað og vera þar af leiðandi með rangar forsendur sem menn gefa sér í því hvað leiði til þessarar skuldahækkunar.
Ríkisstjórnin hefur hins vegar verið að láta kanna að undanförnu hvort verðlag á grænmeti hafi verið að hækka á síðustu missirum. Fyrstu vísbendingar eru í þá veru að svo sé ekki.
Í öðru lagi spyr hv. þm. hvort afnema beri þessar viðskiptahindranir og hvort ég telji að það sé rétt að fella úr gildi eða breyta búvörulögunum. Ég hef aldrei litið á löggjöfina um landbúnaðinn sem heilagan hlut sem ekki megi breyta. Ég tel hins vegar að hér sé hvorki staður né stund til þess að taka þá umræðu. Nú er að hefjast önnur samningalota varðandi GATT-málin. Þar eru landbúnaðarmálin undir. En löggjöfin um landbúnaðinn er ekki heilög að mínu viti frekar en önnur löggjöf sem þarf sífellt að vera í endurskoðun.