[prenta uppsett í dálka] 21. fundur
Menntamálaráðherra (Björn Bjarnason) (andsvar):
Herra forseti. Varðandi fyrirspurn hv. þm. um hvort þetta ætti að hafa áhrif á fjárveitingar til atvinnuleikhópa eða áhugaleikhópa þá snertir þetta fyrst og fremst atvinnuleikhópana. Ég vil vekja athygli á því að í fjárlagafrv. er gerð tillaga um hækkun á fjárframlagi til atvinnuleikhópa um 2 millj. kr. ef ég man rétt. Sú tillaga er gerð enda þótt ég vissi að þetta frv. væri í smíðum. Ég lít því ekki þannig á að ætlunin sé að draga úr stuðningi við atvinnuleikhópana. Þvert á móti lít ég á þetta sem mikla aukningu í opinberum fjárstuðningi við atvinnuleikhópa og í góðu samræmi við þá gróskumiklu starfsemi sem nú er stunduð í leikhópum utan atvinnuleikhúsanna og hefur blómstrað mjög á undanförnum missirum. Ég tel að ef frv. verður samþykkt óbreytt og ef tillögurnar sem liggja fyrir í fjárlagafrv. verða samþykktar sé stigið mjög stórt skref til að treysta fjárhagslegar forsendur fyrir starfsemi atvinnuleikhópa.
