Svanfríður Jónasdóttir (andsvar):
Herra forseti. Það var ekki ég sem fullyrti að við byggjum í frjálsu markaðshagkerfi heldur var það flm. sem það gerði og notaði sem rökstuðning fyrir þessari tillögu sem hann ber hér fram. Ég lít þannig á að Ríkisútvarpið sé hluti af þeirri menningu sem við viljum varðveita, sem við viljum efla og sem við viljum þróa í okkar samfélagi. En af því að hv. flm. vísar í það að ef menn vilji hafa hlutina þannig því þá ekki að sækja til þess fé í ríkissjóð, þá minnir mig að það hafi ekki bara verið samþykkt á nýliðnum landsfundi Sjálfstfl. að afnema bæri afnotagjöldin heldur líka hitt að koma yrði í veg fyrir það að Ríkisútvarpið sækti fé í ríkissjóð og ég vænti að ég verði leiðrétt ef þetta er ekki rétt.