Sturla Böðvarsson (andsvar):
Virðulegur forseti. Ég hlýddi með athygli á ræðu hv. 4. þm. Vestf., Sighvats Björgvinssonar, og það ber auðvitað að fagna því þegar forustumenn í stjórnarandstöðunni leggjast á sveif með frumvörpum ríkisstjórnarinnar. En það var þrennt sem vakti sérstaka athygli mína.
Í fyrsta lagi voru yfirlýsingar hans um hina miklu samstöðu, sérstaklega væntanlega hjá borgarstjórnarmeirihlutanum í Reykjavík, um þetta mál sem hefur auðvitað vakið athygli og svo hins vegar tilvitnanir hans í pólitískar kenningar hv. þm. Svavars Gestssonar sem mér fannst svona jaðra við það að vera hálfger ógnun vegna þeirra staðreynda sem lúta að afstöðu þess hv. þm.
Í annan stað er það tal hv. þm. um auðlindaskatt sem er náttúrlega alveg út úr kortinu og er ekki raunveruleiki.
Í þriðja lagi var umræða hv. þm. um arðgreiðslurnar. Ég vil spyrja hv. 4. þm. Vestf. hvort hann telji eðlilegt að greiða nánast óháð öllu 5,5% arð af því eigin fé sem er uppreiknað samkvæmt samkomulagi eignaraðilanna, hvort það sé eðlilegt út frá sjónarhorni orkukaupenda á Vestfjörðum að greiða 5,5% arð til eigendanna. Það er grundvallaratriði í þessari umræðu.