[prenta uppsett í dálka] 32. fundur
Sjávarútvegsráðherra (Þorsteinn Pálsson):
Herra forseti. Það var fagnaðarefni að það kom mjög skýrt fram af hálfu hv. 3. þm. Vesturl. að hann var ekki að tala fyrir opinberri fjárfestingarstýringu í þessu efni. Ég fagna því að það liggur fyrir í þessari umræðu. Hann vakti hins vegar athygli á því að það kynni að vera óeðlilegt að sölufyrirtæki ættu hlutafé í útgerðarfyrirtækjum eða fiskvinnslufyrirtækjum. Ég ætla ekki að leggja dóm á það. Hins vegar hefur það verið að gerast á mörgum undanförnum árum vegna veikrar fjárhagsstöðu sjávarútvegsfyrirtækjanna að þjónustufyrirtæki þeirra hafa þurft að leggja fjármagn í sjávarútvegsfyrirtækin.
Nú hafa hins vegar þau gleðilegu umskipti orðið á allra síðustu árum að fjárhagsstaða sjávarútvegsfyrirtækjanna hefur verið að styrkjast á nýjan leik og þeir eru nú eftirsóknarverður fjárfestingarkostur. Á sama tíma fer fram mikil umræða um það í þjóðfélaginu að það verði, eins og hv. málshefjandi vakti athygli á, að breyta sjárvarútvegsstefnunni til þess að koma í veg fyrir að sjávarútvegsfyrirtækin geti haft þann styrk sem þau hafa verið að öðlast nú á allra síðustu missirum. Þannig ganga oft hugmyndirnar hver á móti annarri. Ég tel að í þessu samhengi sé það einn mikilvægasti árangurinn sem við höfum verið að ná, að fjárhagsstaða fyrirtækjanna í sjávarútvegi er að verða það sterk að þau eru að verða eftirsóknarverður fjárfestingarkostur og þurfa ekki að vera upp á náð og miskunn eigin þjónustufyrirtækja. Ég tel að það væri mikið glapræði að breyta um stefnu sem kippti þessum grundvelli undan þessum höfuðframleiðslufyrirtækjum landsins.
