Frsm. allshn. (Sólveig Pétursdóttir):
Virðulegi forseti. Ég get tekið undir þau orð sem féllu í einni ræðunni áðan að það er til góðs þegar við ræðum um umferðarmál á hinu háa Alþingi. Vissulega er í þessu frv. sem ég mæli fyrir fyrir hönd allshn. í nefndaráliti, tekið á ýmsum breytingum á umferðarlögum. Engu að síður hefur breytingartillaga um aukinn hámarkshraða fengið einna mesta umfjöllun og ýmislegt hefur verið sagt í hita umræðunnar um það mál.
Það er vafalaust rétt hjá hv. þm. Vilhjálmi Egilssyni að aðstæður og öryggi í umferðinni hér á landi eru orðnar mun betri nú. En það eru bara svo mörg atriði sem tengjast þessu máli og vega þarf saman. Jú, það er rétt vegir og bílar hafa batnað, en vafalaust hafa þessi atriði og aðstæður almennt líka batnað á Norðurlöndum. Samt sem áður eru áherslur á lækkun umferðarhraða markmið númer eitt í öllum norrænum umferðaröryggisáætlunum. Þetta er auðvitað engin tilviljun.
Mig langar til að lesa aðeins upp úr þeirri umferðaröryggisáætlun sem þingið samþykkti í fyrra. Það er kafli sem fjallar um sennilega þróun umferðarslysa í framtíðinni, með leyfi virðulegs forseta:
,,Búast má við svipaðri umferðaraukningu fram til aldamóta og verið hefur sl. 10 ár. Ef ekki verður að gert umfram það sem gert er í dag í slysavörnum má búast við hlutfallslega svipuðum slysatölum eða í versta falli lítils háttar aukningu. Hlutdeild ungra ökumanna í slysum hefur aukist verulega á síðustu 10 árum. Búast má við sama ástandi og verið hefur ef efnahagsástand batnar, akstur ungs fólks eykst og ekkert verður að gert í öryggismálum. Áhyggjuefni er að slysum á landsbyggðinni fjölgar meira en í þéttbýli. Þar er mikill ökuhraði og slæm akstursskilyrði ein helsta orsök umferðarslysa. Þrátt fyrir nýbyggingar og lagfæringar á þjóðvegum á landsbyggðinni hefur slysatíðni á þeim ekki lækkað m.a. vegna aukins hraða og umferðar.``
Þetta eru athugasemdir sem ekki verður litið fram hjá.
Virðulegi forseti. Ég ætla ekki að lengja þessa umræðu frekar en ítreka þakkir til hv. þm. fyrir þessar umræður.