Bryndís Hlöðversdóttir:
Herra forseti. Hér leggur minni hluti fjárln. til að liðurinn Starfsmenntun í atvinnulífinu verði áfram sjálfstæður liður eins og verið hefur í félmrn. en með þeirri tillögu sem meiri hlutinn hefur lagt til eða sem lagt er til í frv., þá ætlar ríkisstjórnin að gera þennan lið að nokkurs konar hliðarbúgrein í Atvinnuleysistryggingasjóði.
Minni hluti fjárln. telur nauðsynlegt að þessi liður sé merktur sérstaklega til þessa mikilvæga verkefnis sem er starfsmenntun í atvinnulífinu. Aðeins þannig er tryggt að það fé sem um ræðir verði framvegis notað til eflingar starfsmenntun sem er eitt mikilvægasta verkefni í atvinnulífinu í dag. Ég segi já.