Steingrímur J. Sigfússon:
Herra forseti. Við í þingflokki Alþb. og óháðra stöndum ekki að þessum skattalagaæfingum hæstv. ríkisstjórnar sem felast m.a. í breytingum á tryggingagjaldi og síðan í breytingum á álagningu vörugjalda og lækkun endurgreiðslu virðisaukaskatts á viðhaldi íbúðarhúsnæðis. Við höfum því ekki greitt atkvæði um meginefnisgreinar frv. En hér eru brtt. á ferð í staflið a á 2. tölul. á þskj. 325 sem sérstök ástæða er til að vekja athygli á þar sem verið er að tína ýmsa útgjaldaliði inn á þennan tekjustofn, tryggingagjaldið, fjárveitingar til Staðlaráðs og fyrirbæris sem hér er nefnt Icepro sem á að fá 0,001% af þessum gjaldstofni. Við teljum þetta óeðlilegt með öllu og ef ríkið kostar slíka starfsemi eða styrkir hana þá eigi að gera það með venjubundinni fjárveitingu á fjárlögum. Við greiðum því atkvæði gegn þessum tölulið brtt.