[prenta uppsett í dálka] 50. fundur
Ágúst Einarsson:
Herra forseti. Þessi breytingartillaga meiri hluta efh.- og viðskn. er formlega mjög slæm. Hér er vísað til tryggingasjóðs einyrkja og sagt í lagatextanum:
,,Er sett hafa verið lög um tryggingasjóð einyrkja``
o.s.frv. Það er vísað í sjóð sem ekki er til. Það er getið um tryggingasjóð einyrkja í frv. sem bíður 1. umr. Það er óhæfa í lögum að vísa í lög sem ekki eru til þótt í ákvæði til bráðabirgða sé og þó svo fordæmi um slíka afgreiðslu séu til. Þetta er óvönduð lagasetning. Ég hef ekki á móti efni málsins og það hefur komið alveg skýrt fram af minni hálfu. Ég hef boðist til þess í efh.- og viðskn. að standa að því að nefndin flytti þessa tillögu þegar frv. um tryggingasjóð einyrkja var komið á það stig í þinginu að hægt væri að lögfesta þetta samtímis. Það ber enga brýna nauðsyn til þess að setja þetta ákvæði til bráðabirgða eins og lagt er til í tillögu meiri hlutans. Ég sit hjá við afgreiðslu þessarar breytingartillögu en varðandi tryggingagjaldið í heild hefur það komið fram að við þingmenn jafnaðarmanna styðjum það frv.
