Svavar Gestsson:
Herra forseti. Þetta frv. í heild er í raun og veru botnlaus subbuskapur á öllum sviðum. Hér áðan var samþykktur fallskattur. Nýlega hefur verið samþykkt veruleg skerðing á framlögum til Framkvæmdasjóðs fatlaðra og hér er gert ráð fyrir því að létta starfsmenntakostnaði öllum af ríkissjóði og flytja hann yfir á Atvinnuleysistryggingasjóð. Það er yfirgengilegt að standa svona að málum og sýnir virðingarleysi ríkisstjórnarinnar við starfsmenntun að svona skuli að hlutunum staðið. Svona vinnubrögðum á að hafna. En með hliðsjón af því hvernig málið er sett upp sitjum við hjá við atkvæðagreiðslu um þessa tillögu.