Ásta R. Jóhannesdóttir:
Herra forseti. Þessar breytingar þýða að ekki verður sett fé í vegaframkvæmdir á höfuðborgarsvæðinu eins og gert er ráð fyrir í vegáætlun sem Alþingi hefur samþykkt. Það þýðir að arðsömum framkvæmdum verður að fresta svo sem vegagerðinni í Ártúnsbrekku, þ.e. breikkun Miklubrautar frá Höfðabakka að Skeiðarvogi, breikkun Reykjanesbrautar og vinnu við Vesturlandsveg í Mosfellsbæ. Niðurskurður til vegamála lendir nánast allur á höfuðborgarsvæðinu. Þar var skilið við verk hálfunnið í haust sem var átalið vegna umferðaröryggis. Ég mótmæli þessum niðurskurði á þjóðhagslega nauðsynlegum framkvæmdum og vara við afleiðingum hans sem er aukin slysahætta í umferðinni á höfuðborgarsvæðinu. Ég segi nei.