[prenta uppsett í dálka] 52. fundur
Hjörleifur Guttormsson:
Virðulegur forseti. Ég þakka hæstv. ráðherra fyrir upplýsingarnar, svo langt sem þær ná. Spurt var um fjárveitingar og ég heyri að það hefur ekki verið rætt á vettvangi ríkisstjórnar. Ég geri ráð fyrir að hæstv. ráðherra vissi ef svo væri. Ég er ekki í aðstöðu til að spyrja hæstv. heilbrrh., húsbónda Geislavarna ríkisins, hvort tryggðar hafi verið fjárveitingar til stofnunarinnar svo hægt sé að taka upp vöktun á þessu efni. Það er alveg ljóst að efnið mun berast hingað. Það er á hraðferð norður með vesturströnd Noregs og fer inn í straumakerfið í gegnum Norður-Íshafið hingað suður til Íslands. Vafalítið kemur það hér fram innan fárra ára og því nauðsynlegt að hefja eftirlitið nú þegar.
Ég spyr hæstv. ráðherra hvort hann muni taka þátt í ráðherrafundi OSPAR-ríkjanna í Lissabon í júní á þessu ári. Þar fer hinn árlegi ráðherrafundur fram. Mun hann fara og fylgja eftir kröfum Íslands um þessi efni? Ég legg ríka áherslu á að reynt verði að ýta á bæði Breta og Frakka til að loka hið fyrsta endurvinnslustöðvunum Dounreay, Sellafield og La Hague.
