[prenta uppsett í dálka] 55. fundur
Samgönguráðherra (Halldór Blöndal) (andsvar):
Herra forseti. Það kom ekki á óvart að hv. þm. vefðist tunga um tönn þegar hann var spurður beint að því á hvaða jarðgöng hann vildi helst leggja áherslu. Við heyrðum að svörin voru nokkuð óljós þegar þar kom hans máli. En ég ítreka spurninguna: Á hvaða jarðgöng vill hv. þm. fyrst og fremst leggja áherslu nú?
Í öðru lagi vil ég taka fram að á árinu 1997 var varið beint af vegáætlun 3 milljörðum kr. til nýframkvæmda og ef Hvalfjarðargöng eru tekin með er verið að tala um 5 milljarða kr. Á þessu ári, 1998, er um 3,4 milljarða að ræða og ef Hvalfjarðargöng eru tekin með eru það rétt tæpir 5 milljarðar, við getum sagt 5 milljarðar kr. Vegaframkvæmdir eru því mjög miklar í landinu nú. Ég hygg að einungis einu sinni hafi nýframkvæmdir til þjóðvega verið meiri. Það var á árinu 1973, 5,6 milljarðar kr.
