[prenta uppsett í dálka] 55. fundur
Magnús Stefánsson (andsvar):
Herra forseti. Eins og ég sagði í minni ræðu, þá stendur í mínum huga óhögguð sú óánægja sem ég lýsti ásamt öðrum hv. þm. í nefndaráliti samgn. með það að hluti markaðra tekjustofna rynni í ríkissjóð. Það hefur ekkert breyst. Hins vegar, eins og ég sagði, þá féllst ég á að afgreiða fjárlögin svona vegna þess að það blasti við að vegáætlun eða áætlun um framkvæmdir vegamála á þessu ári yrði ekki skert miðað við það sem var afgreitt á síðasta ári. Ég vona að þetta sé skýrt.
Hv. þm. spyr hvort ég sé bjartsýnn á að sú áætlun sem hér liggur fyrir gangi eftir. Ég er það reyndar. Hv. þm. stjórnarliðsins hafa samþykkt, líklega tvö síðustu ár, að skerða vegáætlun til að ná mikilvægum markmiðum í ríkisfjármálum, þ.e. að ná hallalausum fjárlögum og það er mjög mikilvægt að það takist og það höfum við margoft rætt og ég hygg að við séum sammála um það. Þessar aðgerðir voru liður í því að þau markmið næðust og þannig svara ég þessari spurningu. En ég er bjartsýnn á að þessi markmið gangi eftir sem hér eru lögð fram.
