Hjörleifur Guttormsson:
Virðulegur forseti. Ég hef tekið að mér að fylgja úr hlaði till. til þál. sem nokkrir hv. þm. eru flutningsmenn að og eins og hæstv. forseti gat um er 1. flm. varamaður minn á þingi, Þuríður Backman. Hún flytur málið ásamt hv. þm. Agli Jónssyni, Gísla S. Einarssyni, Ísólfi Gylfa Pálmasyni, Kristínu Ástgeirsdóttur og Sigríði Jóhannesdóttur.
Eins og sjá má er því breiður stuðningur að baki þessarar tillögu sem nú kemur fyrir þingið öðru sinni. Hún var flutt á síðasta þingi og vísað til landbn. Tillagan er svohljóðandi, með leyfi forseta:
,,Alþingi ályktar að skora á ríkisstjórnina að undirbúa viðeigandi breytingar á landbúnaðarlöggjöfinni til þess að unnt sé að styðja bændur sem aðlaga búskap sinn viðurkenndum lífrænum búskaparháttum í samræmi við lög nr. 162/1994 og reglugerð nr. 219/1995, um lífræna landbúnaðarframleiðslu.``
Þetta er tillögutextinn og rökstuðning fyrir tillögunni er að finna í greinargerð og raunar einnig í fylgiskjali sem er grein úr Bændablaðinu frá því fyrir tveimur árum, rituð af dr. Ólafi Dýrmundssyni.
Lífrænn landbúnaður er grein sem er í örri þróun hér á landi en þó enn frekar í ýmsum öðrum löndum. Mönnum er að verða ljóst að finna megi verulega möguleika til nýbreytni í landbúnaðarframleiðslu. Markaður fyrir vörur sem ræktaðar eru undir merkjum lífræns landbúnaðar og uppfylla tiltekin skilyrði fer stækkandi. Því er nauðsynlegt að hlúa að þessari atvinnuþróun. Í sveitum landsins veitir ekki af að skjóta fótum undir það sem breikkað getur grundvöllinn og styrkt stöðuna.
Á fundinum var áður rætt um stórt mál sem tengist landbúnaðinum. Fleiri mál eiga að fylgja á eftir sem m.a. snerta lífræna landbúnaðarframleiðslu sem hv. þm. Gísli S. Einarsson, sem einnig stendur að þessu máli með fleirum, er 1. flm. að. Þessi tillaga og fleiri skyldar hafa verið til skoðunar í landbn. þingsins og fengið mjög jákvæðar umsagnir að því mér er tjáð. Væntanlega fer hv. landbn. yfir málin undir styrkri forustu formanns nefndarinnar til að þoka málinu fram og tryggja afgreiðslu þess eins í ljósi þess að hér er um mjög gott mál að ræða og undirtektir við það hjá þeim sem best ættu að þekkja til hafa verið jákvæðar.
Í greinargerðinni er vikið að mörgum atriðum sem snerta málið. Þar er komið inn á stöðu lífrænnar framleiðslu og þróunar í nágrannalöndum, á Norðurlöndum og víðar, og bent á að verið er að hverfa frá framleiðslutengdum stuðningi við landbúnað yfir í umhverfistengdan. Aðlögunarstyrkur við lífrænan búskap er veigamikill liður í þeirri þróun. Bóndi sem fer út í lífræna ræktun þarf að kosta töluverðu til endurræktunar og breytinga á aðstæðum á jörðum. Hann þarf að aðlaga vélakost og standa straum af eftirlits- og vottunarkostnaði og þannig þarf að kosta miklu til ef horfið er frá hefðbundnum búskap og aðstaðan notuð til þess að treysta lífrænan landbúnað.
Búnaðarþing hefur látið sig þetta mál skipta og ályktaði um það 1996. Í framhaldi af því var unnin skýrsla sem kom út í nóvember 1996 undir heitinu Stuðningur við aðlögun að lífrænum búskap, og segja má að það mál sem hér er flutt eigi rætur í þessum ályktunum og umfjöllun um þessi mál. Fyrsti flm. hefur sýnt þessum málum verulegan áhuga, t.d í heimahéraði. Þar hafa verið haldnar ráðstefnur um lífrænan landbúnað og vonir við hann tengdar á Austurlandi eins og víðar. Raunar er þegar fengin nokkur reynsla af lífrænum landbúnaði. Á Héraði koma mér í hug bændur í Vallanesi sem hafa um árabil þróað lífræna framleiðslu og staðið mjög myndarlega að verki í þeim efnum. Þeir hafa safnað reynslu sem getur orðið notadrjúg fyrir frekari þróun á því svæði og víðar. Alþekkt er það sem unnið hefur verið á Suðurlandi svo annað dæmi sé tekið, ekki síst í Mýrdal en einnig víðar þar sem menn hafa fengist við lífrænan landbúnað í allmörg ár.
Hér er, virðulegur forseti, gert ráð fyrir að undirbúa viðeigandi breytingar á löggjöf til þess að unnt sé að styðja bændur til að laga búskap sinn að viðurkenndum lífrænum búskaparháttum. Vísað er til ýmissa lagabálka sem þarf að athuga í því sambandi. Það er nefnt að í aðlögun að lífrænum búskap gæti einnig falist stuðningur við landgræðslu og skógrækt og þá sérstaklega ræktun skjólbelta sem telja má nauðsynlega forsendu lífrænnar ræktunar víða um land.
Virðulegur forseti. Ég legg til að mál þetta gangi til landbn. sem hefur áður fjallað um málið og vænti þess að það fái mikla athygli í hv. nefnd og helst jákvæða afgreiðslu á þessu þingi þar sem athugun á málinu hefur þegar farið fram á næstliðnu þingi. Ég vænti því þess að það hljóti afgreiðslu nú á þinginu.