Jóhanna Sigurðardóttir (andsvar):
Herra forseti. Ég vek athygli á því að hæstv. forsrh. hefur ekki svarað þeirri lykilspurningu sem ég beindi til hans: Með samþykki frv. forsrh. sem kveður á að stjórnsýslan á miðhálendinu skuli vera í höndum sveitarfélaga, munu þá tillögur sem nú liggja fyrir um miðhálendið fá lagastoð? Getur ráðherra staðfest það skipulag? Erum við þar með að samþykkja skipulag á miðhálendinu sem ekki byggir á stefnumörkun Alþingis í ferðamálum, orkumálum, samgöngumálum eða umhverfismálum? Eru þá nokkrir aðilar sem að miðhálendistillögu þessari hafa staðið að marka stefnu til framtíðar í þessum málaflokki?