Ögmundur Jónasson:
Hæstv. forseti. Það er ekki nóg með að menn séu búnir að leggja mikla vinnu í frv. heldur er verið að fjalla um málefni tæplega 5 þús. Íslendinga sem eru án atvinnu. Hér er verið að fjalla um málefni atvinnulausra og mér finnst stefna ríkisstjórnarinnar koma berlega fram í fjarveru hennar nú. Í gær voru hér til umfjöllunar lög sem banna verkfall sjómanna. Þá var hvert einasta sæti í þingsalnum skipað. Nú er verið að ræða málefni atvinnulausra Íslendinga. Hér í fundarsalnum er ekki einn einasti hæstv. ráðherra og ekki einn einasti stjórnarþingmaður. Þetta er stefnuyfirlýsing ríkisstjórnarinnar. Þetta er nöturleg stefnuyfirlýsing og nöturleg stefna.