[prenta uppsett í dálka] 70. fundur, 122. lþ.
Heilbrigðisráðherra (Ingibjörg Pálmadóttir):
Virðulegi forseti. Mér er vel kunnugt um aðstæður allar á Ljósheimum. Ég fór þangað í heimsókn fyrir nokkru. Eftir það skipaði ég nefnd, eins og ég sagði í fyrri ræðu minni, sem á að gera úttekt á þörfinni og hversu stórt húsnæði þyrfti til framtíðar fyrir langlegusjúklinga á Suðurlandi.
Vegna þess að hv. þm. vitnaði í Halldór Kiljan Laxness varðandi þá byggingu sem verið er að reisa í Hveragerði, en þar er einnig verið að byggja hjúkrunarheimili og aðeins 10 mínútna akstur á milli Selfoss og Hveragerðis, þá fannst mér rétt að minna á að þar er mikil uppbygging í gangi fyrir eldri borgara en ég sagði það jafnframt í ræðu minni að það muni ekki uppfylla þá þörf sem er á Suðurlandi. Og það er þess vegna sem undirbúningur er þegar hafinn í heilbrrn. varðandi nýframkvæmdir við hjúkrunarheimili á Selfossi.
