Flm. (Sighvatur Björgvinsson) (andsvar):
Herra forseti. Það frv. sem við erum að fjalla um núna fjallar hvorki um útfærslu veiðileyfagjalds né virkjunargjalds vegna vatnsaflsvirkjana. Hið síðara verður til umræðu á eftir þannig að frv. þetta tekur ekki á þeim málum.
Hvað varðar allar aðrar spurningar sem hv. þm. bar fram um málið svarar frv. þeim öllum, þ.e. hver borgar, hvernig og hvernig er það ákveðið? Ákvæðin í frv. svara öllum þeim spurningum hvað varðar auðlindagjald fyrir jarðefni, námur og grunnvatn í eigu þjóðarinnar. Þeim er öllum svarað. En auðvitað er ekki í frv. svarað spurningum um önnur mál eins og veiðileyfagjaldið enda ekki um það fjallað þar.
Hv. þm. spurði hvenær það hefði orðið afstaða jafnaðarmanna að fella niður eða draga stórlega úr tekjuskatti. Ætli það séu ekki 25 ár síðan þáverandi formaður norska Verkamannaflokksins, Trygve Bratteli, kom hingað til lands og hélt mjög athyglisverðan fyrirlestur á vegum Alþfl. einmitt um þetta, þ.e. að það væri rétt og nauðsynlegt vegna hinna stóru ágalla tekjuskattkerfisins að taka til rækilegrar skoðunar að draga mjög úr því kerfi í skattheimtu. Í framhaldi af því fluttu þingmenn Alþfl. oft á þingi tillögur um að hækka söluskatt sem var þá mjög lágur en nota peningana sem kæmu með hækkun söluskatts til þess að lækka eða fella niður tekjuskatt. Nú er söluskattur, öðru nafni virðisaukaskattur, hins vegar orðinn svo hár að þetta er ekki lengur raunhæft en þessar tillögur um að draga úr vægi tekjuskatts hafa um áratugi verið til skoðunar hjá jafnaðarmönnum, ekki bara á Íslandi heldur líka í nágrannalöndunum þó að ég skuli fúslega viðurkenna að ekki hefur miðað nægilega langt í rétta átt.