[prenta uppsett í dálka] 73. fundur, 122. lþ.
Guðný Guðbjörnsdóttir (andsvar):
Virðulegi forseti. Vegna orða hv. síðasta ræðumanns um réttlæti þess að horfa í að þeir sem hætti útgerð fái greitt fyrir sínar aflaheimildir, þá skil ég ekki réttlætið í því að þeir sem notið hafa gjafakvóta, t.d. frá árinu 1983, og ákveða að hætta núna, geti stokkið út úr kerfinu með fleiri milljónir eða milljarða kr. í vösunum. Á meðan þyrftu þeir sem verið hafa í útgerð í 3 ár að kaupa sig inn í kerfið. Ég skil ekki það réttlæti sem þarna á að vera að baki.
Ég vil jafnframt nota tækifærið og endurtaka spurningu til hæstv. dómsmrh., sem ég bar fram út af máli mínu áðan, um það hvort ríkisstjórnin fyrirhugar á næsta ári að flytja frv. til stjórnarskrárlaga um að fiskstofnarnir í hafinu verði sameign þjóðarinnar eins og stjórnarsáttmálinn gerir ráð fyrir.
