Margrét Frímannsdóttir (andsvar):
Virðulegi forseti. Vissulega er þessi samningur m.a. til þess að vísindin hafi ákveðið svigrúm en þó að fengnu samþykki þess einstaklings sem í hlut á þar sem upplýsingarnar eru hans persónuleg eign. Samningurinn er líka gerður, hv. þm., til þess að hindra að einstaklingurinn verði undir í kapphlaupi tækniframfaranna. Hann er m.a. til þess að hindra að einstaklingurinn og hans persónulegu réttindi verði undir í kapphlaupi tækniframfaranna. Við skulum hafa það í huga.