[prenta uppsett í dálka] 115. fundur, 122. lþ.
Steingrímur J. Sigfússon (andsvar):
Herra forseti. Ég tók eftir því að hv. þm. taldi sérstaklega athyglisvert að ekki hefði komið fram veigamikil efnisgagnrýni á frv. sem hér um ræðir, fyrir utan þessi ákvæði sem tengjast hálendinu. Skyldi nú ekki ástæðan, herra forseti, vera sú að frv. er í raun og veru ákaflega efnisrýrt. Það er merkilega innihaldslítið í ljósi þess að eiga að heita heildarendurskoðun á sveitarstjórnarlögum og fyrir minn smekk verð ég, herra forseti, að segja þetta afar metnaðarlítið heildarfrv. frá hæstv. félmrh. Það er leitun að nýmælum eða einhverju sem tíðindum sætir í því. Þá er auðvitað komið að lykilspurningu málsins. Er þá ekki hv. þm. Sturla Böðvarsson, þrautreyndur sveitarstjórnarmaður, sammála því að það skipti engu máli hvort þessi snepill fer í gegn í vor eða ekki. Það eru enn frekari rök fyrir því að fresta málinu að í sveitarstjórnarfrv. er ekki neitt sem skiptir sköpum fyrir sveitarstjórnarstigið í landinu. Þess vegna er algerlega skaðlaust að það bíði til haustsins.
