[prenta uppsett í dálka] 116. fundur, 122. lþ.
Fyrirspyrjandi (Ásta B. Þorsteinsdóttir):
Virðulegi forseti. Ég þakka hæstv. heilbrrh. fyrir svör hennar. Þar upplýsti hún að nefnd sem starfar að mótun heildstæðrar stefnu í geðheilbrigðismálum barna og ungmenna fari senn að ljúka störfum. Við fáum þá innan skamms að sjá niðurstöður af þeirri vinnu.
Heilbrrh. hæstv. sagði einnig að hugmyndir væru um að koma á sameiginlegri greiningarstöð fyrir börn með geðræn vandamál. Þá langar mig til þess að beina þeirri fyrirspurn til hæstv. ráðherra hvort þetta eigi að vera ein greiningarstöð á landsvísu eða hvort að hugsunin sé kannski sú að þjónusta við landsbyggðina verði efld í þessum efnum sem og annarri heilbrigðisþjónustu. Hvert sækja börn frá landsbyggðinni eftir geðlæknisþjónustu? Til Akureyrar, nefndi hæstv. ráðherra, en að öðru leyti sér maður ekki að önnur úrræði séu í boði en hér í höfuðborginni þurfi börnin á því að halda.
Ég vil aðeins ítreka spurningu mína frá því áðan varðandi það að fagfólk hefur ítrekað bent á þörfina fyrir bráðastofnun eða lokaða meðferðarstofnun fyrir börn og ungmenn svo hægt sé að taka á bráðum vanda. Ég spurði hæstv. heilbrrh. hvort hún deildi þessari skoðun fagmannanna og hvort hún teldi að þörf væri á að koma slíkri stofnun á laggirnar. Ef svo er, hyggst hún beita sér fyrir því að svo verði?
Í svari við fyrirspurn minni fyrr í vetur, þar sem ég beindi þeirri spurningu til hæstv. heilbrrh. hvort hún teldi að það væri heppileg lausn að veita börnum og ungmennum meðferð vegna vímuefnanotkunar á stofnunum sem eru sniðnar að þörfum fullorðinna, sagði hæstv. heilbrrh. að hún teldi það ekki vera góða lausn. Því spyr ég aftur: Telur hæstv. heilbrrh. það koma til greina að fjölga sérstaklega meðferðarúrræðum fyrir börn hér í höfuðborginni þar sem er hægt væri að veita þeim viðunandi meðferð vegna vímuefnavanda og geðræns vanda, sem miðuð væri við aldur þeirra?
