Valgerður Sverrisdóttir:
Hæstv. forseti. Með þessari lagabreytingu eru gerðar veigamiklar endurbætur á félagslega húsnæðiskerfinu. Ekki er dregið úr hinni félagslegu aðstoð en valfrelsi einstaklinga er aukið verulega með því að taka upp félagslegt lánakerfi í staðinn fyrir félagslegt íbúðakerfi. Hið félagslega íbúðakerfi sem nú er verið að loka var barn síns tíma.
Þeir einstaklingar sem nú eru í félagslega kerfinu halda öllum réttindum sínum samkvæmt gildandi lögum. Átak verður gert til að fullnægja þörf fyrir leiguíbúðir. Húsaleigubætur eru nú greiddar í öllum sveitarfélögum á allt leiguhúsnæði til lágtekjufólks.