Rannveig Guðmundsdóttir:
Virðulegi forseti. Þessi nýja húsnæðisstofnun, Íbúðalánasjóður, á að verða afskaplega sjálfstæð stofnun eins og hefur komið fram. Þar á ekki að vera neitt ríkisframlag, engin afskipti félmrh. öðruvísi en að kalla eftir upplýsingum o.s.frv. eins og mun koma fram í atkvæðaskýringum hér.
Þrátt fyrir þetta er á bls. 70 getið um þær reglugerðir sem á að setja um þennan sjóð og þær, herra forseti, eru hvorki fleiri né færri en 28. Í þeirri grein sem við greiðum atkvæði um er getið um fyrstu reglugerðina.
Alþingi hefur verið að þoka sér frá þessum vinnubrögðum, reyna eins og unnt er að setja skýringar í lagagreinarnar sjálfar og komast fram hjá því að vera með mikið reglugerðafargan og það er skelfilegt að sjá það í lok þings 1998 að setja eigi 28 reglugerðir við lög um stofnun sem sagt er um að eigi að vera algjörlega sjálfstæð.