Rannveig Guðmundsdóttir:
Herra forseti. Formaður og framkvæmdastjóri Sambands ísl. sveitarfélaga komu á fund félmn. Þar kom skýrt fram að þeir vilja ekki ákvæði um að 50 íbúðir verði byggðar 1999--2000. Þeir vilja hafa opið ákvæði þarna.
Það kom líka fram að þeir hafa engan áhuga á að ganga til samninga um fjármögnun leiguíbúða. Þeir óska eftir óbreyttu fyrirkomulagi lánveitinga til leiguíbúða og hafna áttunda bráðabirgðaákvæðinu sem kveður á um hver verði þáttur sveitarfélaga til fjármögnunar félagslegra íbúða.
Ég vek athygli á því, herra forseti, að verkalýðshreyfingin hefur lagst gegn þessu frv. Hún hefur óskað eftir frestun á því en hér er verið að gefa til kynna að úrræði finnist varðandi leigumarkaðinn með samstarfi við þessa aðila sem tekið hafa svo ákveðið og fast til orða.