Sigríður Jóhannesdóttir:
Hæstv. forseti. Hér er um að ræða samning milli Bændasamtaka Íslands og ríkisstjórnar Íslands sem var lagður í atkvæðagreiðslu meðal þeirra sem hafa greiðslumark í mjólk og samþykktur með 90% atkvæða. Eftir það fer hann til meðferðar hjá Alþingi og þá er veigamiklu atriði í samningnum breytt, þ.e. því atriði sem til hvað mestra framfara horfði, að það yrði settur á kvótamarkaður og m.a. voru bundnar vonir við að það mundi lækka verð á mjólkurkvóta. Þetta atriði er tekið út úr samningnum í meðferð þingsins og ég tel að við þetta hafi samningurinn tekið veigamiklum breytingum. Ég greiði atkvæði gegn þessari breytingu.