Sigríður Jóhannesdóttir:
Hæstv. forseti. Þessi grein, 15. gr., er því miður ekki til þess fallin að gera veg Tilraunastöðvarinnar að Keldum meiri í sjúkdómsgreiningu dýra. Hún er fremur til að minnka tengsl þjónustu við sjúkdómsgreiningar og grunnrannsóknir á dýrasjúkdómum. Þá orkar einnig mjög tvímælis, út frá stjórnsýslulegum sjónarmiðum, að sami aðili, í þessu tilviki yfirdýralæknir, og á að fyrirskipa og sjá um sóttvarnaraðgerðir, hafi einnig með höndum rannsóknarþjónustu sem slíkar aðgerðir byggjast á. Því er lagt til að greinin falli brott.