Samgönguráðherra (Halldór Blöndal):
Herra forseti. Ég býst við að öllum þingmönnum sé kunnugt að skipulegri meðferð Reykjavíkurborgar á flugvellinum er ekki lokið. Þess er ekki að vænta að ný skipulagsnefnd Reykjavíkurborgar, kjörin af nýrri borgarstjórn geti komið saman fyrr en í miðjum þessum mánuði. Það er auðvitað útilokað að bjóða út verk þegar ekki hefur verið gengið frá skipulagi yfir verkið. Þær ræður sem hér hafa verið haldnar eru því á misskilningi byggðar og mér er ljúft að leiðrétta þennan misskilning.
(Forseti (RA): Forseti vill láta þess getið að gefnu tilefni þótt hann gerði ekki athugasemd í þetta sinn en gerir það nú upp á framhaldið að gera að strangt til tekið eiga þingmenn að óska eftir að gera grein fyrir atkvæði sínu í upphafi atkvæðagreiðslunnar en ekki eftir því sem umræðan gengur fram.)