[prenta uppsett í dálka] 141. fundur, 122. lþ.
Guðný Guðbjörnsdóttir (andsvar):
Herra forseti. Ég get tekið undir það með hv. formanni menntmn. að þessi vinnubrögð voru viðhöfð í nefndinni enda sagði ég ekkert annað en að málið hefði ekki verið sent út í vetur. Ég nefndi það vegna þess að það fólk sem sendi inn umsagnir í fyrra vissi af því en það virtist ekki átta sig alveg á því að núna væri allt í einu komið að því að afgreiða þetta frv. Það var fyrst og fremst það sem ég átti við með því að málið hefði ekki verið sent út í vetur. Það hefði verið ástæða til þess að gera það því þá hefðu kannski fleiri sett sig í stellingar til að ræða það á opinberum vettvangi.
