Steingrímur J. Sigfússon:
Herra forseti. Það voru umræður og fyrirspurnir á Alþingi sem komu þessu máli af stað. Væri ekki fyrir rétt Alþingis til þess að krefja upplýsinga, þá hefði valdakerfinu í landinu væntanlega tekist að leyna þessu máli.
Alls staðar á þjóðþingum í kringum okkur og í stjórnmálum í kringum okkur er það alsiða, frekar reglan en undantekningin, að vandasöm og stór mál af þessu tagi séu sett í hendur á sérstökum rannsóknarnefndum, ýmist þingkjörnum rannsóknarnefndum eða nefndum sem skipaðar eru óháðum, valinkunnum og óumdeildum sérfræðingum í slíkum vandasömum verkum.
Hér á að koma í veg fyrir að Alþingi geti fylgt þessu máli eftir. Hæstv. forsrh. hefur haft í hótunum um að takmarka málfrelsi stjórnarandstöðunnar. Þá, herra forseti, er ekkert eftir annað en taka af Alþingi réttinn til þess að leggja fram fyrirspurnir. Er það kannski í vændum hér? Er verið að leggja drög að því með framkomu meiri hlutans hér á Alþingi? Ég segi nei við þessari gerræðislegu og óskynsamlegu frávísunartillögu sem er verst fyrir hæstv. viðskrh. sjálfan.