Forseti (Ólafur G. Einarsson):
Hv. alþingismenn. Ég þakka hæstv. starfsaldursforseta, Ragnari Arnalds, árnaðaróskir í minn garð. Enn fremur þakka ég hv. alþingismönnum fyrir það traust sem þeir hafa sýnt mér með því að endurkjósa mig forseta Alþingis. Ég vænti þess að eiga gott samstarf við alla alþingismenn á því þingi sem nú fer í hönd eins og á síðasta þingi.
Eins og hv. alþingismönnum er kunnugt er stödd hér á landi í boði Alþingis þingmannasendinefnd frá Litháen undir forustu Landsbergis, forseta þingsins. Sendinefndin er nú stödd á þingpöllum og vil ég fyrir hönd Alþingis bjóða Landsbergis þingforseta og fylgdarlið hans velkomið hér við þingsetningu. Ég vænti þess að för sendinefndarinnar til Íslands verði til þess að styrkja enn frekar þau góðu tengsl sem eru milli landa okkar.
Forseti vill biðja hv. alþingismenn að votta sendinefndinni frá þingi Litháens og litháísku þjóðinni vináttu og virðingu með því að rísa úr sætum. --- [Þingmenn risu úr sætum.]
Ég hef frá því ég tók fyrst við embætti forseta Alþingis lagt á það áherslu að það væri meðal mikilvægustu verkefna forustu þingsins að koma húsnæðismálum þess í viðunandi horf. Vandinn er ekki síst fólginn í því að Alþingi starfar nú í átta húsum og stafar af því margvíslegt óhagræði og kostnaður fyrir þingið. Á vegum forsætisnefndar hefur því um skeið verið unnið að athugun á því hvernig nýta megi Alþingisreitinn til nýbygginga fyrir þingið.
Nú liggja fyrir tillögur að framtíðarskipulagi húsnæðismálanna og er ráðgert að öll starfsemi þingsins verði innan Alþingisreitsins sem markast af Kirkjustræti, Vonarstræti, Templarasundi og Tjarnargötu. Í tillögunum er gert ráð fyrir nýbyggingum og endurbótum á eldra húsnæði innan reitsins. Áætluð stærð nýbygginga fyrir skrifstofur, fundaaðstöðu og ýmsa þjónustu er um 3.500 m2 en á móti kemur að Alþingi mun segja upp leiguhúsnæði og selja húsnæði utan Alþingisreitsins sem er um 2.500 m2. Húsnæðisaukning yrði þannig um 1.000 m2 og felst sú stækkun einkum í þjónustubyggingu sem reist yrði vestan við Alþingishúsið og tengd því. Sú bygging mun hýsa ýmsa almenna þjónustustarfsemi og leiða til þess að úr Alþingishúsinu megi færa ýmsa starfsemi sem ekki hentar að hafa í húsinu, en umferð um húsið er nú miklu meiri en það þolir til langframa. Við þessa breytingu verður um leið rýmra um þá starfsemi og þjónustu sem brýnast er að hafa hér í Alþingishúsinu.
Skipulagstillögur þessar hafa þegar verið kynntar forsætisnefnd og formönnum þingflokka sem og skipulagsyfirvöldum Reykjavíkurborgar. Þá hef ég lagt áherslu á að eiga góða samvinnu um málið við fulltrúa Torfusamtakanna, húsafriðunarnefndar og embætti borgarminjavarðar. Í tillögunum er gert ráð fyrir að verkefnið megi framkvæma í hóflegum áföngum og er reyndar þegar lokið fyrsta áfanganum, endurbyggingu Kirkjustrætis 8b og 10 ásamt tengibyggingu þeirra húsa. Mjög mikilvægt er að næsti áfangi í húsnæðismálum þingsins verði sú þjónustubygging sem ég vék að áðan. Þessi áform þarf að ræða á Alþingi og hér þarf að ákveða hvenær ráðist verður í framkvæmdir.
Að venju hefur forsætisnefnd samþykkt starfsáætlun fyrir það þing sem nú er að hefjast og verður henni útbýtt til þingmanna í dag. Ég vil vekja athygli á nokkrum atriðum í starfsáætluninni. Í fyrsta lagi er gert ráð fyrir þinghléi síðustu vikuna í október líkt og á síðasta þingi til að gera þingmönnum hægara að skipuleggja fundi í kjördæmum sínum. Er smám saman að festast í sessi sú venja að gera slíkt hlé síðustu vikuna í október. Í öðru lagi verður meiri tími til nefndastarfa en á síðasta þingi með því að þingfundir falla niður tiltekna daga og verða þeir dagar einvörðungu notaðir til nefndastarfa. Góð reynsla fékkst af því á síðasta þingi að hafa nefndaviku bæði á haust- og vorþingi og verður nú haldið enn frekar áfram á þeirri braut. Þá er gert ráð fyrir að reglulegu nefndastarfi ljúki 30. apríl, en þingfrestun verði laugardaginn 8. maí. Þingfrestun að vori er áformuð í fyrra lagi á þessu þingi vegna sveitarstjórnarkosninga sem halda á 23. maí. Á síðasta þingi tókst okkur að standa við starfs\-áætlunina og ljúka þingstörfum á tilsettum tíma og vænti ég þess að svo megi einnig verða á þessu þingi.
Fyrr á þessu ári fólu þingflokksformenn tveimur úr sínum hópi að vinna með mér fyrstu drög að tillögum um endurskoðun þingskapa. Við endurskoðunina hefur breytingum á þingsköpum verið skipt í þrennt. Í fyrsta lagi eru breytingar á atriðum sem ágreiningur hefur verið um milli þingflokka og varða aðallega ræðutíma. Í öðru lagi hefur verið rætt um breytingar á ýmsum ákvæðum sem heppilegra þykir að fylgi nýju kjörtímabili og má þar nefna breytingar á nefndakerfi þingsins. Í þriðja lagi eru svo breytingar sem lúta að formsatriðum, skipulagi þingsins, stjórn þess og afgreiðsluháttum, en um þær eru vissulega líka skiptar skoðanir. Um þessi síðastnefndu atriði liggja nú fyrir tillögur í frumvarpsformi sem eru til athugunar meðal formanna þingflokka og vænti ég þess að hægt verði að leggja fram frumvarp um breytingar á þeim þætti þingskapa fljótlega á þessu þingi. Að öðru leyti verður endurskoðunarstarfinu haldið áfram og stefnt að frekari breytingum sem gætu tekið gildi við upphaf nýs kjörtímabils. Ég heiti því á samstarf þingmanna um þetta efni í þeirri von að okkur takist að ljúka heildarendurskoðun á starfsháttum Alþingis fyrir lok þessa kjörtímabils.
Í ávarpi mínu við þingsetningu í fyrra gat ég um þá stórstígu þróun sem orðið hefur í upplýsingamiðlun af hálfu Alþingis með tilkomu gagnabanka um Alþingi og störf þess. Þessi gagnabanki nýtist ekki aðeins alþingismönnum heldur er aðgengilegur almenningi á vef Alþingis á tölvunetinu eða alnetinu eins og það er stundum kallað. Stöðugt er unnið að því að efla og bæta gagnabanka þingsins og það er mér því sérstakt ánægjuefni að geta skýrt frá því að með nýlegu samkomulagi Alþingis og dómsmálaráðherra verður almenningi frá og með deginum í dag tryggður frjáls aðgangur að lagasafninu á vef Alþingis án þess að greiða sérstakt gjald fyrir þá notkun.
Ég endurtek þakkir mínar til þingheims fyrir að trúa mér fyrir þessu embætti. Það er ásetningur minn að eiga gott samstarf við alla alþingismenn.