Ísólfur Gylfi Pálmason (andsvar):
Herra forseti. Góðir áheyrendur. Ég vil þakka hv. 14. þm. Reykv., Kristínu Ástgeirsdóttur, fyrir skelegga og góða ræðu. Það var ekki sami bölmóðurinn í þessari ræðu og hjá mörgum hv. þm. stjórnarandstöðunnar. Þingmaðurinn kom víða við. Meginefni ræðunnar voru örar breytingar í þjóðfélaginu sem eru auðvitað staðreynd. Þingmaðurinn ræddi m.a. um neikvæða afstöðu Íslendinga til menntunar. Hér er ekki um rétta fullyrðingu að ræða. Íslendingar kappkosta að koma börnum sínum til mennta. Það hefur orðið mikil bylting í menntakerfi þjóðarinnar á síðustu 20 árum á framhalds- og sérskólasviðinu og einnig í æðri menntun. Sífellt fleiri skólar útskrifa vel menntað háskólafólk og hafa hæft og vel menntað starfsfólk í þjónustu sinni. Það er því staðreynd að Íslendingar hafa áhuga á menntun. Misrétti er nokkurt í menntamálum þessarar þjóðar. Það veldur m.a. þeirri byggðaröskun sem hv. þm. vék að í ræðu sinni. Það er kostnaðarsamt fyrir dreifbýlisfólk að koma börnum sínum til mennta. Það misrétti þurfum við að brúa hvar í flokki sem við stöndum. En við verðum einnig að huga alvarlega að því hvernig menntun nýtist einstaklingum og þjóðinni í heild.
Herra forseti. Við verðum auðvitað að gera það sem í okkar valdi stendur til að bæta kjör, ekki einungis menntafólks, heldur alls fólks í landinu. Jafnvægi og stöðugleiki í efnahagslífinu eru lyklar að bættum kjörum Íslendinga.
Herra forseti. Í stórum dráttum er ég sammála hv. þm., ekki einungis í kvöld heldur oft áður. Kvennalistinn hefur unnið gott starf í íslenskum stjórnmálum. Kvennalistinn stendur á krossgötum. Íhugið, hv. kvennalistamenn, það eru meiri líkur á því að þið getið unnið málefnum Kvennalistans brautargengi með því að sameina Kvennalistann flokki okkar, Framsfl. Við höfum þegar samþykkt metnaðarfulla jafnréttisstefnu. Þetta er spurning um hvort þið viljið hafa áhrif eða hvort þið viljið vera áfram áhrifalausir, gáfaðir, vel hugsandi hugmyndafræðingar á Alþingi.