Gunnlaugur M. Sigmundsson (andsvar):
Herra forseti. Ef hv. þm. Ögmundur Jónasson hefði verið í salnum í upphafi máls míns þá hefði hann tekið eftir að ég tók sérstaklega fram að það væri yfirbyggingin í þjóðfélaginu sem væri að sliga það, ekki það sem varið væri til velferðarmála í þjóðfélaginu. Ég tók einnig sérstaklega fram að laga þyrfti kjör heilbrigðisstétta. En ég veit, herra forseti, að þingmaðurinn var ekki í salnum í upphafi máls míns þannig að ég vildi koma þessu að.
Um að hlutur samneyslunnar sé meiri í nágrannaríkjunum, þá er það rétt. Hún er meiri á Norðurlöndunum en hins vegar er hún í OECD-ríkjunum í heild um 16% en 21% á Íslandi og þó hægt sé að segja að hún sé hærri í Danmörku og Svíþjóð þá tel ég að það eigi ekki að vera þau lönd sem við eigum helst að sækja til til að meta hvort við erum á réttri leið eða ekki.