[prenta uppsett í dálka] 11. fundur
Steingrímur J. Sigfússon (andsvar):
Herra forseti. Niðurskurðarfárið og upplausnarástandið í heilbrigðismálunum hefur hér verið gert að umtalsefni. Þegar Sjálfstfl. á í hlut, fulltrúi hans talaði hér síðast, þá vaknar stundum sú spurning að hve miklu leyti sé um lúmska og markvissa stefnu að ræða, sveltistefnu Sjálfstfl. í heilbrigðismálum. Opinber þjónusta er látin drabbast niður, svelt, og verkefnin færð yfir í einkageirann eða einkarekstur. Þetta mætti kalla einkavæðingu aftan frá eða einkavæðingu gegnum bakdyrnar.
Hæstv. fjmrh. er kjarkmaður og hann ætti auðvitað að hafa manndóm í sér til að koma og svara því hver hin raunverulega stefna Sjálfstfl. er. Hver er hinn raunverulegi tilgangur Sjálfstfl.? Hæstv. ráðherra hefur í raun og veru verið yfirheilbrigðisráðherra í rúm sex ár og vaðið um kerfið með niðurskurðarhnífinn í annarri hendinni og tékkheftið í hinni. Það væri miklu meiri manndómsbragur að því að hæstv. ráðherra kæmi út úr skápnum og segði okkur hversu mikið Sjálfstfl. ætlar að einkavæða heilbrigðiskerfið. Á að skapa hér amerískt ástand?
