[prenta uppsett í dálka] 11. fundur
Fjármálaráðherra (Friðrik Sophusson) (andsvar):
Virðulegur forseti. Í fyrsta lagi kemur skýrt fram í skýrslu Ríkisendurskoðunar að rekstrarkostnaður sjúkrahúsanna í Reykjavík hækkaði um 4,4% á föstu verðlagi frá 1990--1995 þannig að kostnaður og útgjöld hafa hækkað.
Í öðru lagi hafa lyf lækkað sem betur fer, m.a. vegna þess að það er meiri samkeppni á lyfjamarkaðnum. (Gripið fram í.) Svo langar mig til að spyrja hv. þm. sem er ókyrr hér í sæti sínu tveggja spurninga: Í fyrsta lagi. Finnst honum eðlilegt að það sé mismunað eftir því hvort menn láta gera aðgerðir á sér innan sjúkrahúsa eða utan sjúkrahúss? Skiptir þá ekki efnahagur máli? Þannig er það í dag. Á að leiðrétta það? Þar sem hann tekur undir það með öðrum að kjarasamningar séu í uppnámi, m.a. vegna þess að ekki hafi verið samið við lækna, vil ég spyrja hv. þm. hve miklu meira vill hann láta borga læknum umfram þá sem eru t.d. sem eru í BSRB? Ég er ekki að tala um krónur heldur í hlutfalli. Um það snýst þessi deila. Hve miklu meira eiga læknar að fá en þeir sem starfa í röðum BSRB? Það væri gott að fá svar við þessum spurningum.
